風之后三姊妹買南灣

【明報專訊】「風之后」李麗珊日前與家人斥資1686.8萬元，買咗新地（0016）牽頭發展嘅鴨脷洲豪宅「南灣」一個1300多呎、面向深灣遊艇會海景一房單位作投資用途，折合呎價1.26萬元。呢個交易噚日已經上咗田土廳，單位業主分別係李麗珊、李麗然、李麗萍，以分權共有（TENANT IN COMMON）嘅方式，各佔業權三分之一，原來珊珊係同佢姐妹一齊做業主。

雖然一睇個名都知道係三姊妹。不過，小琴都力求真確，噚日都搵到珊珊丈夫黃德森求證一吓。黃生同小琴證實，李麗然、李麗萍確係珊珊嘅姊妹。至於是否買來收租，黃生就冇正面回應，只係珊珊同佢姐妺有自己嘅諗法咁話。

買家多海內外富商

早前黃生向本報話，珊珊同佢9名兄弟姊妹，一齊到南灣睇樓。當時佢話，如果買咗，都唔會做為佢一家四口嘅新居，並笑言「無咁本事，未搞得掂兩個女」。

除咗「風之后」姊妹外，小琴翻查資料，南灣亦有一啲富豪買家，包括上海富商屠海鳴。屠海鳴多年前已來港居住，最廣為流傳嘅一件事，就是屠於數年前，曾收購1輛喺上海車展亮相4小時、價值近1000萬元嘅「全球特別紀念版」勞斯萊斯。另外，註冊登記上，亦有桃李滿門嘅大一藝術設計學院校監呂歐陽麗堃嘅名字，佢亦以4171.2萬元購入2座16樓B室。而印尼富商、內衣品牌Honey Lady企業拓展總監方寬哲（PERMANA, FERDINAND），亦購入2座22樓A室。

報料電郵﹕piano@mingpao.com