青姐網上教80後理財

【明報專訊】有「股壇小辣椒」之稱嘅青姐（胡孟青），平日除咗主持電台電視節目外，仲要寫報紙專欄同出席大大小小投資講座，可謂百足咁多爪。佢最近又有新搞作，就係响匯豐嘅電子交流平台www.hkYFi.com.hk，化身成理財顧問，向年輕一輩教理財。

青姐同小琴話，時下Y世代（即係80年至95年出世，現時15至30歲既年輕一代）有目標，但齋儲錢係好難實現得到，死跟父母買股票又太高風險，呢次透過Q&A方式，响網上解答年輕人財富管理上遇到問題，同埋灌輸正確理財觀念同知識，覺得構思好新鮮。「話畀佢哋知呢個世界唔係淨得股票，其實仲可以買債券、保險等等平衡風險。平時我忙到唔得閒覆人電話，email又懶得寫，但今次工作咁有意義，係我主動回覆匯豐（出任理財顧問），但就一定唔會畀冧把（股票推介）。」

唔單止咁，青姐仲會邀請陳淑莊、趙增熹等年輕人熟悉嘅名人，拍攝一個「青姐飯局」，分享嘉賓理財觀及奮鬥歷程。青姐坦言，平時交易日返到屋企都已經好夜，所以拍片通常都係周末進行，周日夜晚就一邊4歲嘅囝囝瞓覺，一邊覆電郵提問。

匯豐：年輕人好受 瀏覽人數不俗

匯豐話，同青姐係以項目合作方式進行（project-based），已完成錄影訪問同資訊最少可用到今年底，仲話青姐好受年輕人歡迎，單日最高錄得超過1.1萬瀏覽人次。網站推出至今兩個幾月，登記會員已經超過2.6萬人，人數可以話係同類網站之冠。

報料電郵﹕piano@mingpao.com