農行力撐文化產業

【明報專訊】農業銀行（1288）自7月中上市以來，股價表現認真唔錯，令小琴對呢間公司都有啲另眼相看，因此亦特別留意農行消息嘅一舉一動。噚日，小琴喺農行網站上見到一個公告，原來農行日前與國家文化部簽訂全面戰略合作協議，農行將加入「文化部文化產業投融資公共服務平台」，支持文化產業嘅發展，將可以喺網上受理文化企業貸款嘅申請。

為咗隆重其事，農行董事長項俊波當日親自出席啟動儀式。大家可能都知道，項董事長除咗係銀行家呢個最為人所知嘅角色外，佢都係一個文化人，曾親自撰寫內地多套影視劇集，當中80年代，由內地著名導演田壯壯執導嘅電視劇《人民不會忘記》，項董當時就擔任製片同編劇。因此，項董對文化產業應該十分熟悉，唔知會唔會親自揀選一啲優質嘅文化企業做客仔，谷一谷農行貸款增長呢？

話時話，大家都唔好忽視內地文化產業嘅商機，事關喺2009年7月22日，國務院常務會議通過咗《文化產業振興規劃》（簡稱《振興規劃》），係繼紡織、輕工等規劃之後嘅第十一大產業振興規劃。國家將重點推進嘅文化產業包括：文化創意、影視製作、出版發行、印刷複製、廣告、演藝娛樂、文化會展、數字內容和動漫等，即係話，文化產業係國策支持嘅產業，可以講得上係朝陽產業。

今年3月，包括央行、財政部等9部委，提出咗金融支援文化產業振興發展嘅意見，文化部與5家銀行建立咗合作機制，而農行係第6家加入此合作機制。截至今年6月，已經有30多個重點文化產業項目獲得文化部合作銀行嘅貸款，涉及貸款金額130多億元人民幣。

報料電郵﹕piano@mingpao.com