堡獅龍大換血 老闆娘掌權

【明報專訊】堡獅龍（0592）呢排真係多事幹，繼後人對早前創辦人羅定邦遺產有爭議，捲入家族爭產案，噚日堡獅龍嘅管理層更加出現大換血。大股東羅家聖太太錢曼娟，將會由集團非執董兼非執行主席，轉任集團執行主席及執董，大權在握。而現任副主席兼行政總裁陳素娟，成為大換血中嘅犧牲品，將會喺10月1號，辭任全部管理層職位，由執董麥德昌接任行政總裁。

羅家聖太太錢曼娟，一向活躍於香港嘅慈善圈子，喺仁濟醫院董事局主席。佢絕少擔任堡獅龍嘅管理工作，究竟喺咩原因令到錢曼娟出掌集團執行主席。通告話，錢曼娟將會負責堡獅龍嘅「整體方向」。無端端錢曼娟要領導「整體方向」，實情同堡獅龍嘅業績，或者同羅氏家族嘅爭產風波有無關係，就真係不得而知。

陳素娟「完成個人目標」辭職

至於陳素娟，突然辭任堡獅龍副主席兼行政總裁，好多人都會覺得好突然，更加唔明嘅係堡獅龍喺聲明都話，陳素娟同董事會無意見分歧，辭職只係因為陳素娟任內已經完成「個人目標」。陳素娟都算係堡獅龍嘅老臣子，08年由財務董事升做行政總裁，帶領堡獅龍轉形象，代表作係將旺角堡獅龍旗艦店變成座幾層鮮綠色好搶眼嘅外表。當時陳素娟仲話，由計數變到做零售，都係由老板羅家聖一手提議，仲話份工好有趣。估唔到宜家，陳素娟竟然因為「個人目標」已經達成而辭職。

報料電郵﹕piano@mingpao.com