臧明華沽豪宅 勁賺922萬

【明報專訊】樓價持續急升，唔少豪宅價格，更升高過97年高峰期。近期有唔少名人沽貨獲利。小琴收到風，旅遊發展局前總幹事臧明華，亦都啱啱喺幾日前，沽出位於港島渣甸山白建時道33號豪宅嘉雲臺一個單位，佢揸住呢個單位唔到一年半，帳面獲利多達922萬元，獲利高達48％，認真和味。

據消息靈通人士報料，臧明華名下嘅公司，近日以2830萬元，沽出嘉雲臺4座一個中層單位，單位面積1819平方呎，以呎價1.56萬元沽出。呢個單位喺09年4月，用1908萬元、呎價1.04萬元買入，臧明華揸住個單位唔夠一年半，就係咁樣炒一轉，就勁賺922萬元。

渣甸山豪宅 持貨未夠年半

已沽出單位用來投資，另據消息話，臧明華自已亦住喺嘉雲臺1座一個高層單位，而呢個單位亦已經沽出。如果屬實，前後兩個單位共可套現5000至6000萬元。嘉雲臺係由長實（0001）發展，總共約有440伙單位，於1986年及1988年分兩期落成，樓齡約22至24年。

臧明華於07年4月離開旅發局。當年因為「超豪醫療保險」事件，搞到好大件事。事緣07年11月底，審計署發表報告，批評臧明華喺財政司長未批准下，喺04年9月至06年9月間，獲前主席周梁淑怡批出一份價值近18萬元、惠及家人嘅醫療保險。其後立法會帳目委員會喺08年4月底發表報告，「特別譴責」臧明華，並促請旅發局向臧追回醫保差額。直至08年6月底，臧明華向旅發局支付14萬元醫療保險嘅保費差額。

報料電郵﹕piano@mingpao.com