張欣爆股神9月29日訪京

【明報專訊】股神巴菲特同微軟主席蓋茨，今個月將會訪華，實行佢哋嘅「勸捐之旅」。呢兩位超級籌款大使，具體幾時成行，以及會見啲乜人，暫時仍未有官方嘅公布。不過，北京地產女富豪、SOHO中國（0410）行政總裁張欣，率先爆料話，巴菲特會喺9月29日到北京，佢亦已經獲得邀請，大家見面交流做慈善。

於微博爆料 獲邀請見面

張欣喺微博上寫道﹕「收到蓋茨和巴菲特發來的邀請，他們9月29號來北京，與中國的朋友交流慈善事業。我在媒體上看到他們來中國說服中國人慈善捐款，美國的慈善事業做得很成熟，蓋茨做的是更上一層樓，我們才剛起步，要學習的很多。」

巴菲特、蓋茨承諾捐出大部分身家後，早前又向美國富豪發出公開邀請，呼籲佢哋捐錢，佢哋並且表明會喺今年及明年，分別親自到中國及印度游說富豪捐錢。今次來中國，被形容係「勸捐」。張欣同佢老公潘石屹，都做過唔少慈善，不過，會否響應呼籲，捐出部分身家，就有待揭曉。

先前，另一位內地富豪、獲得巴菲特入股嘅比亞迪（1211）主席王傳福，喺香港出席記者會時，被問到會否捐身家時就迴避問題，佢指未睇過有關報道，故不便作回應。