漢堡王太大 小肥羊啃唔落

【明報專訊】內地「火鍋第一股」小肥羊（0968），近排股價急升，皆因有個傳聞指，小肥羊想食咗漢堡王（Burger King）。小肥羊首席執行官盧文兵噚日對小琴話，Burger King太大，小肥羊食唔起。雖然小肥羊否認收購，而真正買家亦曝光，之但係股民仍將小肥羊股份炒到不亦樂乎，噚日一度再升近10％，收市仍升5.5％至5.15元。

小肥羊想食漢堡王呢個消息，係來自《華爾街日報》9月1日嘅報道，報道引述消息話，漢堡王正在與幾家企業展開收購談判，其中包括來自中國嘅小肥羊。消息傳出之後，小肥羊股價立即有反應。雖然9月2日外電已開始報道，真正買家其實係一間基金公司3G Capital，但小肥羊股價仍一路上升，似乎股民都覺得，金融市場乜都有可能。

難蛇吞象 股價已飈

小琴噚日打電話向小肥羊管理層求證一吓，小肥羊首席執行官盧文兵話，從來沒考慮過買漢堡王，不知道從那裏傳出呢個消息，佢話：「那麽大間公司，我們怎麽買？」佢又話，公司最近並無收購計劃，一切運作正常，股價波動屬市場現象。

事實上，美國漢堡王規模僅次於麥當勞，喺全球75個國家和地區擁有1.2萬家連鎖餐廳。截至今年6月，漢堡王喺中國內地共開設咗33家餐廳，市值約23億美元，即179億港元，而小肥羊嘅市值只係得53億港元，換言之，Burger King市值比小肥羊大2.4倍。

報料電郵﹕piano@mingpao.com