渣打調查300人：港青35歲前 首要買樓

【明報專訊】安居置業，係好多香港人嘅願望，大家又有無諗過，幾時要買第一層樓呢？最近渣打就做咗個調查，原來買樓係好多人喺35歲之前嘅「第一志願」，其次就係要錢搵錢，然後「第三志願」就係結婚，目標呢樣嘢個個唔同，你哋又估吓小琴有咩目標？

渣打今年8月訪問咗300個28歲至35歲嘅年輕人，問佢哋35歲前，最想做到嘅5件事。香港樓價咁高，相信好多打工仔都要捱貴租，有近六成受訪者話最大心願係買樓，其中以28歲至30歲呢個年紀嘅人置業意欲較強。

其次搵銀 結婚排第三

小琴估港女都會恨嫁，唔知港男又恨唔恨娶老婆呢？數據顯示，第三位係結婚，而第四位就係做老闆！中國人有個說法「修身齊家治國平天下」，果然無錯，搵到終身伴侶喺背後默默支持後，就可大展拳腳搞生意做老闆！

渣打啱啱推咗新服務Preferred Banking，就係專針對新興市場呢班有番咁上下身家嘅人，香港、新加坡、馬來西亞同印度，更加係亞洲首站去推呢個新服務。渣打銀行尊尚個人銀行集團總監胡美霞，將呢班年輕有錢人定義為「進富一族」，仲話香港呢個族人有大概125萬個，未來會請多三成嘅客戶經理去服務佢哋。

胡美霞估計，「進富一族」係亞洲市場增長潛力最大嘅一群，到咗2013年，估計全亞洲有8600萬人屬於呢一群，所以渣打出招搵佢哋做客仔，期望未來3年可以倍增Preferred Banking嘅業務呢！

報料電郵﹕piano@mingpao.com