買鄭海泉升職 一賠九

【明報專訊】獅子銀行主席葛霖（Stephen Green）即將離任，邊個做接班人呢個「估人遊戲」，相信會持續到年底。英國嘅博彩公司乘機做生意，特別為此開咗個「盤口」，賭邊個係未來匯控（0005）大班。但有趣嘅係，除咗前高盛總裁約翰桑頓（John Thornton）同現任行政總裁紀勤（Michael Geoghegan）係首兩名大熱之外，我哋熟悉嘅匯控中國董事長鄭海泉、同前匯控主席龐約翰（John Bond）都榜上有名，其中鄭海泉賠率係一賠九，暫居第四大熱門人選。

有傳鄭大班退休機會更大

61歲嘅鄭海泉喺今年2月已經「半退休」，卸下匯控亞太區主席一職，只保留匯控中國董事長同台灣區主席嘅職務。雖然仍擔任匯控執行董事，但近嚟傳出佢在養病，調理身體，兼且佢同葛霖是老拍檔，前者退休，所以亦有傳聞指佢會提早退休。所以小琴見佢喺接班人榜上排第4都好驚訝，賠率係1賠9。

此外，家擔任沃達豐（Vodafone）非執行主席、一頭白髮嘅龐約翰。雖然仲好精靈，日前先至帶領沃達豐盡沽中移動（0941）套現，但畢竟已年屆69歲，而且03年率領匯控買Household International，拖累匯控北美勁蝕，竟都有人估佢做佢接班人（葛霖）嘅接班人，不過賠率就高達1賠33（見表）。

報料電郵﹕[email protected]