日本首家廉航出世

【明報專訊】究竟日圓仲要升到幾時？去日本多過去旺角嘅小琴都好想知，唔該有水晶球嘅賓卡知道的話單聲。正當小琴望住彭博機念念有詞，誠心盼望美元兌日圓唔好穿83之際，睇到單安慰少少嘅消息，就係日本終於都有廉價航空。

第一東方投資伙全日空合營

喺大中華私募基金界都幾有名嘅第一東方投資，噚日宣布同日本全日空航空搞間 JV(合營企業)，係日本第一間廉價航空公司，第一東方會揸住間JV大約33.3%權益，全日空會揸住39%，剩低股權由日本其他投資者持有。成單刁估計投資金額達到150億日圓，計埋都要成14億港元。

當然，小琴同大家一樣，最關心唔係投資額有幾多，同埋會唔會又係「天上有地下無」，得一架飛機，而係間廉航飛唔飛香港先？

好可惜，小琴問過知道單刁嘅老友後有啲失望，事關呢間公司飛機唔會經香港，明年下半年啟業後會先專注日本本土，之後再飛埋中國。

不過諗深一層，日本終於都有廉航總比一間都無好，起碼小琴下次去日本環島遊時，可以唔使次次坐火車或者揸車咁悶！