生日必影木口木面全家福 古仔自嘲愛登士家庭　笑到標眼水

【蘋果日報】古天樂、宣萱、陳豪、謝安琪、梁詠琪、關智斌和張致恆等，前晚現身中環出席一個時尚活動。本月21日是古仔48歲生日，他與宣萱一齊接受傳媒訪問時，提到每年生日回家吃飯後，全家都會木口木面影大合照，由他手抱開始到現在都如是，說完後忍不住大笑，更笑到標眼水，要宣萱遞紙巾給他抹，宣萱亦有笑埋一份。
代代相傳
古仔說：「其實屋企由菲林相機時代已經有咁樣嘅傳統，大家就咁坐埋一齊食飯影相，啲相一路有keep住，有啲仲已經舊到發黃㖭！」問他今年生日願望？他即笑笑口謂：「希望身體健康啦！身體健康先可以影呢啲木口木面嘅相。」並笑言要傳到下一代：「係呀，愛登士家庭。」
對於今年施政報告指會預留十億港元用作香港電影發展基金，古仔稱這是好事：「最重要培育新人，幕前唔好講，幕後近年係多咗好多年輕人開工，一啲燈光、擺機嘅辛苦工作都有女仔加入，好多都好有熱誠，但冇門路，依家政府帶頭鼓勵人入行係好事，睇吓遲啲有冇相關訓練畀佢哋去上啦。」
陳豪消瘦
有份出席活動的陳豪，身形看來比前消瘦，他表示：「弗咗，依家拍緊動作片，所以呢排都不斷健身、食奶粉操大隻。依家由原來160幾磅增至180幾磅，有時間就去做gym、舉鐵，始終人到中年，做運動除咗身體好外，亦都令自己回復青春。」提到他拍攝中的新劇《殺手》，演員相繼受傷，陳豪說：「係呀，黎耀祥、林利都受傷，其實動作片實有，但自己經歷過拍電影嘅動作，拍電視劇真係小兒科，以前碌落山、成把風扇『車』埋嚟都有，真係搵命搏，依家就好多可以用鏡頭就。」
採訪：曹家誠
攝影：陳慧安