【娛樂人物】楊立門陳志雲　女人惡啃緣

【蘋果日報】楊立門還在政府任職的時候，就有「AO歌王」外號，他喜歡唱歌的程度，14年提早退休，簽約唱片公司，殺入娛樂圈。這名「AO歌王」原來與同是由政務官出身的陳志雲份屬好友，讀大學時已經合演舞台劇。現在兩人無官一身輕，決定開騷大爆從前難頂上司的往事，娛樂觀眾。
採訪︰祖李
攝影︰林德雄
現年59歲的楊立門（Raymond）與剛剛「登六」的陳志雲（Stephen），原來有不少共同特點，同樣曾入職政府的二人，都是港大畢業生，求學期間二人都十分有表演慾，陳志雲是港大辯論隊成員，楊立門則經常參加歌唱比賽。
不過，二人正式結緣，還是因讀書時參與演出話劇。楊立門說︰「嗰陣因為演話劇成日見，大家都讀文學院，又係英文系，Stephen讀話劇製作，佢套音樂劇搵我做。」談到當年的音樂劇，陳志雲十分難忘︰「表演前藝術中心水浸，我哋要重新髹過晒個場，真係慘！嗰次演出好犀利，張國榮都有嚟睇，佢仲好似入咗後台畀咗啲意見我哋，當年Raymond個樣好似佢㗎。」
傳與林鄭不和
畢業後，兩人在職場同樣與不少女上司交過手。陳志雲做過商台及無綫，曾跟隨俞琤及六嬸方逸華工作，楊立門擔任發展局常任秘書長時，曾是林鄭月娥下屬，之前更傳兩人不和。談到女上司，楊立門笑言︰「我跟過好多女上司，公務員體系裏面女高官，我差唔多都跟過晒。四個字嗰啲，都幾『啃』吓！哈哈！」楊立門續談女上司惡「啃」之處：「佢哋十分勤力，全個人生都只係工作，你要適應，自己唔係工作嗰陣都要即時回答佢問題。男上司反而識體諒，女上司就預期全世界都好似佢咁，但事實唔係㗎嘛。」
陳志雲亦認同︰「女性爬到某個位，佢哋唔只係女人，亦係男人，佢有女性嘅敏感度，但就算佢好苛刻要求，忽然又會變得感性。」楊立門插嘴︰「但你唔知幾時㗎，好突發性！有時估計佢會體諒，點知唔係，但有時以為死梗，咦！又唔係噃！」
要24小時候命
陳志雲再接口大談親身經驗︰「佢哋期望你24小時都喺度，我記得有次同女上司開會，喺半島酒店傾到人哋打烊。嗰日我病緊嘅，到咗點幾兩點，佢突然話︰『你都係返去休息先，你唔舒服嘛！』不過佢記性好好，就算你投入過一次，有次你甩咗，嗰次都可以填番啲分。」陳志雲一邊講、楊立門一邊笑︰「講得啱！佢哋記性好好。」
兩人現在同於高位退下來， 均有「無官一身輕」感覺。楊立門說︰「冇咗好多枷鎖，我依家鍾意寫吓專欄、唱吓歌，記者問我，我可以講吓呢個、講吓嗰個，嗰陣唔得㗎。」陳志雲亦謂︰「離開咗管理層後輕咗好多，做咗咁耐，我真係好唔鍾意權力，因為權力帶嚟好大責任、負擔，我喺無綫做咗18年都係食素，嗰陣有人笑我︰『食素不如講真話！』哈哈，咁公司拍板你就要講公司嗰套。」
楊立門歌唱比賽季軍
楊立門現年59歲，82年畢業於香港大學，同年加入政府，歷任副教育統籌司、工業貿易署署長、民政事務局常任秘書長等職位。他於14年提早退休，17年開始獲委任為中華廠商聯合會行政總裁。
楊立門素有「AO歌王」之稱，未加入政府前已參加不少歌唱比賽，76年在商台舉辦的業餘歌唱比賽奪獨唱組季軍，82年參加第一屆新秀歌唱大賽打入15強，但因考到政府工而退出。
陳志雲能唱能棟篤笑
陳志雲現年60歲，81年於香港大學以一級榮譽畢業，獲聘為政務主任（AO），92年任職影視及娛樂事務管理處助理處長時，獲商台挖角離開政府。94年陳志雲轉投無綫擔任節目部總監，04年升任業務總經理。
陳志雲於11年離開無綫，翌年出任商台行政總裁，14年再轉任首席智囊。陳志雲72年曾參加商台舉辦的業餘歌唱比賽，由84年起又以藝名「韋家晴」兼職電視節目旁白。他亦熱愛粵劇，曾拜名伶陳笑風為師。近年陳志雲多次演出舞台劇，去年更演出《志雲尋志雲登陸舞台演嘢會》，既唱歌又表演棟篤笑。
長青網 - 一站式長者及護老者生活資訊網站