《卡拉屋企》重播憶當年 傳愛犬Popeye咬人　鎮宇平反

【蘋果日報】近日午夜重播的無綫處境喜劇《卡拉屋企》，勾起不少觀眾的回憶，劇中最溫馨的是吳鎮宇跟沙皮狗Popeye的「人狗情」。原來Popeye乃鎮宇第一隻寵物狗，鎮宇日前接受《蘋果》電話訪問，親述人狗情未了，每夢見病逝愛犬也會很傷感。提起Popeye被傳曾因咬傷路人而「坐監」7日，鎮宇為愛犬平反：「冇咬過人，佢好乖！」
無綫處境喜劇《卡拉屋企》是觀眾90年代的集體回憶，劇中受歡迎的角色，不只「泰臣表哥」吳鎮宇、「白頭佬」楚原等，還有沙皮狗Popeye，更是香港首隻電視狗明星，本身是狗女的牠，處女下海卻要反串飾演雄性沙皮狗。Popeye在鏡頭前，見到鎮宇總會開心得擺着尾走去他身邊撒嬌；可惜，集萬千寵愛於一身的Popeye在98年病逝，終年13歲。
難忘臨終時眼神
Popeye其實是鎮宇的愛犬，鎮宇日前接受《蘋果》電話訪問，笑言牠就如自己的女朋友：「佢係隻狗女嚟㗎，係人都以為佢係一隻狗公，佢永遠唔可以離開我三呎範圍，一定黐住我，所以真係幾大件事，好似我條女咁，見唔到我就好慘。」至於Popeye出現在《卡拉屋企》，也是因為牠黐身：「佢好黐人，見唔到我就會一路係咁喊，咁啱梁家樹開《卡拉屋企》，我就申請帶隻狗返工，我諗吓不如畀佢演出埋，Popeye係免費演出。後來唔知點解發神經要寫一集畀Popeye，隻狗演戲要辛苦我去引導佢，但Popeye就咁紅咗。」
有報道指Popeye曾經因為咬傷摸牠的路人而被法院判決「坐監」7日，鎮宇為愛犬平反說：「Popeye冇咬過人，佢好乖。係我另一隻狗，聖班納大型狗，佢都唔係咬人，佢係追嗰個人抓咗一下，而法例規定狗隻要留低7日檢查。」
鎮宇2000年與黃子華及張達明演出《鬚根Show2》，曾提到98年自己首次做導演開拍《9413》時，Popeye患上癌症，兩個月後Popeye離開，吳鎮宇當時傷感地表示：「Popeye用咗一個我畢生難忘嘅眼神同我講再見。」重提當年Popeye病倒，鎮宇指Popeye是因為被車撞後，身體變差：「諗番起都幾激氣㗎，有個動物協會喺灣仔，帶Popeye去睇，唔知點解可以走甩咗，後來打嚟話搵番啦，不過俾車撞倒。導致Popeye成日喺屋企度，冇咁活躍，但佢都幾有性，我第一次做導演，叫佢頂多陣，佢真係頂咗兩個月。」
續約唔成被消失
鎮宇感慨表示：「喺Popeye身上睇到好多人性，我有段時間要離開《卡拉屋企》，啲人好好笑，問我隻狗可唔可以留低。咁即係我唔使演出，但日日湊隻狗返嚟畀佢演出！」是否當年與無綫傾續約談不攏，所以「被消失」近50集？鎮宇說：「係嘅！」他又指：「有時都會夢見Popeye㗎，諗起佢，都會幾sad。」
鎮宇當年拍檔兼前女友李婉華提到「被消失」，她解釋：「我中途出咗嚟，依稀記得嗰時同公司傾緊約，可能未傾好，所以佢哋暫停咗我工作。」
採訪：戴彩煥
長青網 - 一站式長者及護老者生活資訊網站