植物奶小百科

【植物奶小百科】 
#食安仔 ：植物奶個名聽落好似幾新奇，但係原來大家飲過嘅豆奶都係其中一種。一齊睇吓植物製牛奶替代品（植物奶）係點樣整，同埋一啲選購及飲用tips啦🧐！ 
要製作植物奶，首先要將原材料，例如豆類、穀類、堅果或者種子等等，進行乾法或者濕法加工。然後，提取出嚟嘅液體會進行均質處理，令脂肪無咁易分離，增加產品嘅穩定性。最後，就係為產品進行熱處理（例如巴士德消毒、消毒法處理），減少變壞嘅機會👍🏻。
#食安妹妹 ：同牛奶比較，植物奶嘅成分組合，有好大差異。市面上，有植物奶會添加糖分及油脂，豐富產品嘅味道及口感。另外，亦有植物奶產品會添加維他命B12及鈣質等，補充營養。消費者應該按個人嘅膳食同健康需要，參考營養標籤👀，選擇適合自己嘅產品。
食安仔：唔好忘記，植物奶可能含有牛奶無嘅致敏原，例如大豆、穀類及堅果。食物過敏症嘅患者，記住要check真啲包裝上面嘅成分表👀，避開致敏原呀！
⚠️選購注意⚠️
🥛細閱包裝上嘅配料表，食物過敏症患者應避開食物致敏原
🥛參考營養標籤，比較唔同產品嘅營養素含量，按個人需要作選擇
🥛兒童及孕婦如考慮以植物奶代替牛奶，應先徵詢專業意見
⚠️飲用注意⚠️
🥛按包裝指示貯存植物奶。經巴士德消毒嘅植物奶必須放入雪櫃，而經消毒法處理嘅產品可適當咁放喺室溫貯存
🥛一旦開咗包裝嚟飲，應該盡快飲曬佢，或者放入雪櫃
食物安全焦點—植物製牛奶替代品知多點 
 https://bit.ly/39t3A38