食安探險隊挑戰水果山

#食安小隊 ：夏天☀️除咗為大地帶嚟雨水，仲帶畀我哋好多當造嘅水果呀……🥭🍉😋今次我哋就同大家去探秘，拆解近期有關芒果同荔枝嘅食安疑團🧐。

#湯嬸 ：網上有人話出現新品種嘅「飛毛腿芒果」。切開個芒果，發現果肉布滿黑線。其實個芒果係咪被蟲蛀咗呀，仲食唔食得㗎😨？

#食安仔 ：放心！唔係被蟲蛀呀，其實呢啲黑色線係因為芒果裏面嘅樹脂道變暗，出現一種名為「樹脂道變色」(Resin canal discolouration) 嘅食物缺陷。 
樹脂道存在喺某啲植物，包括芒果，佢哋喺芒果入面形成網絡狀，用嚟貯存汁液。「樹脂道變色」較常見於過早採摘嘅芒果，或者受感染或撞傷嘅未成熟芒果。科學家推測芒果出現「樹脂道變色」，可能係對某啲細菌感染而出現嘅自我保護機制。呢啲芒果即使外觀可能無咁靚，但仍然可以安全食用✅。
～～～～～～～～～～～～～～～～～～～～
#Hazel媽媽 ：我聽人講空肚大量食荔枝會有「荔枝病」，係咪真係㗎😰？ 

#食安妹妹 ：荔枝天然含有化學物hypoglycin A同MCPG （未熟嘅荔枝含量更高），會抑制人體產生葡萄糖。如果小朋友或者其他低血糖嘅人士喺空肚期間食好多荔枝，會令佢哋出現頭暈、抽搐、昏迷😵💫、甚至死亡㗎！ 

所以話，大家千祈唔好空肚食荔枝，仲要控制每次進食荔枝嘅分量。大人每次唔應該食多過10粒，而小朋友就唔好食多過5粒喇！