【食安焦點話你知 • 頑強又記仇嘅細菌——蠟樣芽孢桿菌】

煮過嘅食物都仲有細菌😱？究竟邊隻菌咁頑強？之唔係「蠟樣芽孢桿菌」囉，等 #食安小隊 同大家分析呢種細菌嘅厲害之處同對付佢哋嘅招數啦！

蠟樣芽孢桿菌天然存在喺土壤同埋植物🌱（例如大豆）入面。雖然烹煮可以有效殺死呢種細菌嘅繁殖細胞，但就消滅唔到佢耐熱嘅孢子（要用高壓加熱，攝氏121度加熱3分鐘先消滅到）。呢啲死心不息嘅孢子一直潛伏喺食物入面，靜待重生嘅機會。其實加熱嘅過程，除咗會誘發孢子發芽成為繁殖細胞，仲會消滅其他同佢競爭嘅微生物，提供有利繁殖細胞生長嘅環境。如果食物煮完後無妥善貯存，長期放喺室溫🌡，呢啲繁殖細胞就會趁機大量增生及/或產生致吐毒素，啲毒素仲要係耐熱㖭；食咗有好多菌或者有毒素嘅受污染食物，可能會出現腸胃不適、嘔吐🤮同肚瀉等食物中毒嘅徵狀！

記住以下招數，避免頑強嘅蠟樣芽孢桿菌喺食物大量增長：
▪ 食物盡量即煮即食🍽
▪ 唔好一次過煮太多食物🍱
▪ 如果食物唔係即煮即食，或者煮完後要冷凍，應該盡量縮短食物放喺攝氏4度至60度嘅時間⏱
▪ 熱食嘅食物熱存喺攝氏60度以上。凍食嘅食物，必須盡快冷卻❄️，然後貯存喺攝氏4度或以下
▪ 想加快冷卻嘅過程，可考慮將食物切成或者分成較細份等

延伸閱讀－豆漿中的蠟樣芽孢桿菌

➡https://bit.ly/2M8XKIu