【明報專訊】在股壇有「抽水大王」之稱的永義國際（1218）大股東官永義，曾因97年投資物業太過進取而負債纍纍，如今死過翻生，可以東山再起，已學懂何為「量力而為」。對近期全城熱話的樓市，他認為，未來息口依然低企，樓市難有下跌空間，更坦言要盡早上車。「上咗車，你先可以參加樓價升值嘅遊戲」。
學懂量力而為 東山再起
官永義是少數經歷過97年亞洲金融風暴洗禮後，仍能夠東山再起的炒家之一，至今天更有能力作發展商的，官永義便是少數成功的例子。去年因涉嫌洗黑錢而被警方拘捕後，他近日首度接受傳媒訪問。他看好樓市，建議有意買樓者盡快上車。「無錢唯有買細啲面積嘅單位，上咗車才有資格講，就算買唔到的士，都要買番架單車先……你揸的士，我都揸架單車，到頭來乜都無，點樣去追？上咗車，你先可以參加樓價升值嘅遊戲。」
官永義1981年創辦永義國際，80年代從事製衣生意，曾有「T恤大王」稱號，1995年集團上市，將旗下女性服裝品牌Library分店擴展到19間，並在97年10月以逾13億元收購瑞興百貨，計劃將該公司物業拆骨，但因亞洲金融風暴的關係，最終要壯士斷臂，將大批物業蝕讓，並盡數結束所有Library分店。
金融風暴後 曾負債逾10億
市場估計，官永義此役後曾負債10多億元，之後透過公司多次供股集資還債，遭市場批評為「抽水大王」，也因此有資金東山再起，並在樓市低潮時重新吸納物業。
「97年金融風暴，我哋唔見咗20多億元，報紙日日賣我哋公司死梗，卒之我死唔到，仲要係第一個翻身……家公司物業市值都有10多億至20多億元，公司無負債，供股嘅錢喺邊度，喺晒1218（永義國際）度」
97年前後樓市的大升大跌，令不少投資者受到重創，當時炒樓炒股的官永義亦不例外，同期專炒中半山豪宅的秦錦釗更鋃鐺入獄，有「神童輝」之稱嘅羅兆輝也已不知所縱。坦言死過翻生的官永義指出，經過當年亞洲金融風暴後，無論自己及廣大市民，做任何投資已變得謹慎，令樓市更為穩固。
「樓價我睇唔到向下的可能，政府唔會推冧樓市，政府攞地嚟賣，避免民憤，地產商真金白銀拿錢嚟投地，佢哋亦會量力而為，地皮喺有實力人身上，即未來樓市突然回落，佢地亦有能力揸貨，好難叫佢地將啲樓平賣。」
97年金融風暴，市場人士普遍預料官永義就此銷聲匿迹。「經過金融風暴後，由『零』重新開始，知道生命可貴，唔會拿1元去博200元……1億元去賭20億元，一年不會365日晴天，地產市場亦都係一樣……」。
他表示，集團將於本月17日賣地左右，公布旗下的何文田「勝利道1號」開售價；該地正正於06年樓市仍未大升前出價收購後重建。「我收購時都係5000多萬元，我估計售罄可套現約5億至6億元……。如果我唔係經歷過97年亞洲金融風暴嘅教訓，便難以懂得係呢次低位入市。」市場估計該盤意向呎價逾萬元，單位僅63伙，分層面積由350至883方呎。
他笑言，買樓上車一定辛苦，指80後不應事事投訴，叫年輕人不要為難以買樓作控訴。「好多90後、80後初初出嚟做嘢，話無錢買樓，其實買樓都係要辛苦儲返嚟先有錢買，經常投訴（買唔到樓）係無意思，只係將自己做唔到嘅嘢，夾硬放喺人哋度！」「以前殖民地時代邊有社會福利，只不過以前埋頭苦幹，家啲人郁吓就投訴，無飯開都投訴，點解你地唔自己搵飯食？搞吓搞吓便變共產？家啲人衝勁少咗，要求多咗！」
投資物業 首重位置
他指出，早於95年向方潤華以約4500萬元購入銅鑼灣恩平道地舖作投資，其後有人出價約5000多萬元，依然未有沽出。「我特意去個舖門口留意人流，投資商舖一定要位置，地產就係講持貨能力，我一直揸到家，鄰近吳生（吳鎮科）近日以約3億元沽出的商舖，我個舖仲大過佢個舖，點都值3億元。」
官永義認為，無論參與投資樓市股市，最重要懂得遊戲方法及規則，「做製衣一針一線都要跟貼，股票可以虛無縹緲，玩concept（概念），地產就要實實際際，講質素，樓同股票係兩件事……金融給個夢人哋，樓就畀間屋人哋！」「買樓最重要係位置，新界樓就係新界樓，無可能將淺水灣搬入新界，家我哋幢樓擺明叫『勝利道1號』，係市區樓，無理由喺屯門興建淺水灣樓嘛！」
撰文﹕陳天賜
