嘲之鋒入唔到八大 阿叻被圍攻

【明報專訊】藝人「阿叻」陳百祥喺港台節目《我係乜乜乜》中，被問到如何看待時下年輕人時，點名話就讀公開大學嘅學民思潮召集人黃之鋒，「你同我考12個A畀我睇囉，唔通黃之鋒會考到？你連考8間大學都考唔到，咁我點話你叻啊大佬？」其寸嘴言論引嚟網民極大反響，黃之鋒亦喺facebook回應話，「考唔到八大又有乜問題？陳百祥無讀大學兼會考得13分，咪照樣做咗一線藝人。」


之鋒又批評阿叻言論反映其脫晒節，因中學考試已經改制，唔係計有幾多個A，而係用「5**」，又話自己叻唔叻唔係由阿叻判斷，亦唔需要向佢交代，只需向自己負責。


而學者沈旭暉亦喺fb回應阿叻嘅言論，話識唔少人會考10A、9A，但無人做到之鋒做嘅事情，「而且居然唔使着透明圍裙孖煙通，都上到《TIME》封面，叻過唔知幾多間大學都考唔到嘅《TVB Weekly》荷蘭叻好多」。阿叻曾喺港姐決賽擔任司儀時只穿三角褲、披上半透明外衣。


藝人歐錦棠就喺fb話，「要批評甚至打擊一個人，從來不應向他/她的學歷或成就著手，反之亦然；而只懂得憑藉這些所謂主流價值觀去衡量別人的『人』，你的見識智慧有多少，一目瞭然。」