入諮委會？卿姐叫黨員諗清楚

【明報專訊】特首梁振英早前向民主黨伸出橄欖枝，話有意邀請更多民主黨人加入政府嘅諮詢委員會，唔少人都覺得呢個係「死亡之吻」。該黨署理主席劉慧卿噚日接受電台訪問時話，佢哋對此表示歡迎，希望藉此帶入民間聲音，但會呼籲黨員加入時小心考慮。


拒入行會 「諮委會就唔拘」

卿姐重申，民主黨一定唔會加入行政會議，諮委會就唔拘，但相信最後梁振英都唔會委任好多民主黨成員入去。佢又呼籲黨員獲邀時，要小心研究吓先決定加唔加入，以免做政治花瓶。


另外，有傳建制派已協調好，決定畀兩個有意競逐財委會主席嘅議員自由黨張宇人同金融界吳亮星每人做兩年，集中票源抗衡卿姐。卿姐就話，相信如果建制派聯手，佢應該會輸，但會繼續去信全體議員爭取支持。