唐營公關現身「經民聯」

【明報專訊】經濟動力嘅林健鋒、梁君彥等人噚日宣布成立「香港經濟民生聯盟」，林健鋒同梁君彥喺特首選舉中力撐唐英年，對唐唐不離不棄，但今次成立聯盟，就吸納到「梁粉」、工程界盧偉國加入，唔知算唔算做到「大和解」。不過，噚日記者會唐營味道依然好濃，因為在場嘅3個公關或工作人員，都係唐英年競選特首時嘅公關，經常伴隨唐唐左右。


咁多唐營核心喺度，莫非「經民聯」係唐唐幕後有份促成？林健鋒話唐唐絕對同「經民聯」無關係，只不過佢同幾個幫唐唐做過公關嘅前記者認識多年，有乜嘢事佢哋都絕對會幫手咁話。


設新聯盟話同唐唐無關

據了解，其中兩名唐唐前公關，包括做過政府新聞處中文編輯、曾捲入唐唐被指偷步助選嘅洪曉敬，未來都會主力處理「經民聯」嘅工作，噚日佢同另一個同事亦做足準備，收集記者卡片以便日後聯絡；另一公關家正喺唐唐老友、麗新發展主席林建岳嘅公司返工，噚日以義工身分現身喎。