社民連入中聯辦 賀莫言兼曉波

【明報專訊】中國作家莫言獲諾貝爾文學獎，北京過去曾形容諾貝爾獎係陰謀，但今次就高調重視，態度同之前劉曉波、高行健獲獎時180度轉變。


社民連噚日去中聯辦，先後賀莫言同劉曉波拎諾貝爾獎，結果中聯辦接受賀莫言個牌，但到成員黃浩銘賀劉曉波時就被人箍頸拉走。


賀劉曉波被箍頸拉走

噚日黃浩銘同另一個社民連義工，拎住果籃去中聯辦，話要恭賀兩位中國諾貝爾獎得主。今次行動低調，首先由比較生面口嘅義工，拎住賀莫言嘅果籃行入中聯辦，仲成功行入大堂，無被保安阻止之餘，職員亦肯接收賀莫言嘅牌，不過就嫌果籃太舊無收到。


黃浩銘之後就拎住賀劉曉波嘅牌同果籃行入中聯辦，保安如臨大敵，但阿銘都成功行入大堂，不過好快就被保安箍頸拖走，拉返佢出中聯辦鐵閘外。


正當阿銘同保安爭執時，中聯辦副主任李剛經過，阿銘就用佢唔太好嘅普通話，近距離向李剛高叫「釋放劉曉波，結束一黨專政」等口號。