陳家洛怕煙味唔做記者

【明報專訊】公民黨陳家洛係浸會大學政治及國際關係學系副教授，對國際關係當然好熟悉，今日美國大選，家洛都好留意。最近家洛自爆喺80年代尾，曾經喺《經濟日報》做過政治版記者，主力跑基本法諮詢委員會新聞。佢話自己喺1988至89年做記者，雖然時間短，但嗰陣時現任運輸及房屋局副局長邱誠武都未加入《經濟日報》，唔知算唔算係邱武嘅「前輩」呢？


中大政政出身 梁美芬係大師姐

至於點解離開傳媒界，家洛就話當年報館仲畀食煙，佢本身氣管唔係太好，所以最終頂唔順咁話。至於家洛另一個較少人知嘅背景，就係家洛本科唔係讀國際關係，而係中大政治及行政學系畢業。有人問唔通佢同經民聯梁美芬係同學？家洛就笑言，梁美芬係大師姐，當時梗係唔識佢啦。


家洛喺立法會都算係多仔公，共有4女1仔，佢正忙於照顧5個幾月大嘅細仔，但喺立法會都無偷懶，嚟緊要負責環境、教育、發展等多個範疇。