CY校慶「偷食」

【明報專訊】理工大學噚日喺灣仔會展舉行晚宴，筵開逾百席，慶祝建校75周年，唔少高官名人出席。當然唔少得理大校友特首梁振英（CY）啦，而全國人大常委范徐麗泰、前食物及衛生局長周一嶽、港大校務委員會主席梁智鴻、立法會議員林大輝等亦有出席，可謂星光熠熠。


為慶祝75周年校慶，校方特別整咗一個750厘米長嘅巨型蛋糕，別具心思。校方安排喺台上舉行切蛋糕儀式，不過，CY竟然喺切蛋糕之前，忍唔住伸手偷食蛋糕上嘅士多啤梨。唔知CY係因為肚餓先至偷食，抑或因為終審法院駁回何俊仁嘅特首選舉呈請，所以胃口特別好呢？


戴入學舊呔出席

另外，CY以英語致辭時話，自己1974年喺理大前身、香港工業專門學院畢業，佢噚晚仲專登戴埋當年入學時嘅領呔出席，引得在場嘉賓哄堂大笑。CY話好多謝理大對佢嘅培育，又讚揚理大過去75年喺教育方面嘅貢獻。