盛智文現身城大變「景點」

【明報專訊】香港城市大學噚日向中國科學院院長白春禮教授、菱電發展有限公司名譽主席胡法光、海洋公園主席盛智文頒發榮譽博士學位，表揚3人嘅傑出成就同貢獻。胡法光同盛智文親身出席典禮，白春禮教授則未克出席。


獲頒榮譽博士學位

盛智文喺典禮致辭時，勉勵在場嘅應屆城大畢業生，鼓勵佢哋要勇於追尋自己夢想，考慮自己畢業後嘅出路時，唔好只係向錢看。佢話，若果做一啲自己完全無興趣嘅工作，一定唔會成功。佢仲叫畢業生唔好只係聽父母說話，要忠於自己內心嘅想法咁講。盛智文亦有向畢業生傳授成功錦囊，叫佢哋要有創意，思考時要突破既有框架，咁至會成功。


有「蘭桂坊之父」之稱嘅盛智文，原來好受年輕人歡迎，佢喺典禮完咗之後離開會場，即刻被唔少城大畢業生捉住，要同佢合影畢業相，盛智文當然來者不拒啦！