人力民記人參選唔使出錢

【明報專訊】人民力量喺今屆立法會選舉嘅宣傳可謂鋪天蓋地，噚日選舉事務處再公布部分候選人嘅選舉申報，當中人力陳志全（慢必）暫時喺地區直選使最多錢，開支達243.9萬元。不過由於人力嘅候選人都有「選民力量」、「普羅政治學苑」、「香港人網」等人力友好團體，同人力本身捐贈支持，佢哋同民建聯嘅一筆過捐款支持安排相若，人力同民建聯候選人喺選舉幾乎一個仙都唔使畀。但究竟乜嘢人捐錢畀佢哋，選舉開支申報就無交代。


至於工聯會麥美娟使咗140.4萬元，但佢哋個個候選人都要自己孭晒條數！工聯會黃國健話佢哋慣例係用捐款成立個「政務基金」，先畀候選人借錢，但選舉完咗，除咗要還政府資助，仲要分期攤還，一個唔覺意選唔到，都咪話唔「和味」！

工聯會個個要孭數

人民力量港島劉嘉鴻嘅選舉開支都用咗173.9萬元，黃洋達開支係125.4萬元，黃毓民同陳偉業暫未見到資料。人民力量早前獲天行集團贊助6位數字廣告費，喺紅隧出入口擺放巨型廣告，慢必同主席劉嘉鴻亦各自申報獲天行集團7.5萬元廣告贊助。


阿涂開支逾300萬維到皮

民主黨和新民主同盟就各自資助候選人小部分開支，涂謹申就收咗前黨友馮煒光5萬元同盛智文3.5萬元資助。計番數，雖然阿涂開支有386.7萬元，但捐款有83.4萬元，加埋政府12元一票資助有379.7萬元，應該維到皮！