父子兵組隊 圓Masa毅行遺願

【明報專訊】一年一度嘅樂施毅行者噚日開始，參加者中有熟悉身影，馬尼拉人質慘劇殉職領隊謝廷駿（Masa）哥哥謝志堅（左），拍住爸爸（中）同細佬參加。志堅同Emily講，4父子一齊組隊係Masa生前心願，所以佢哋會堅持行到終點元朗大棠度假村。志堅仲話，毅行者嘅路途，就好似為人質事件死傷者追討公道一樣，過程「漫長艱辛」，但佢哋一定會堅持落去。


冠軍隊快舊年紀錄成粒鐘

今年毅行者有約4800人組成1200隊參加，由西貢北潭涌出發，喺48小時內翻越20幾座山，橫越約100公里嘅麥理浩徑同連接路段去到終點。大會噚晚公布，首3隊都係以破紀錄時間完成全程，首名衝線嘅Salomon France隊伍用咗11小時12分鐘，比舊年紀錄快咗足足1小時10分。