新舊AO歡送D姐唔講中文

【明報專訊】前公務員事務局長俞宗怡（Denise，D姐）早前退休，佢喺政府做咗38年咁耐，當然朋友滿天下，唔少政務官（AO）都好敬重佢。雖然D姐離開咗政府幾個月，但成班政務官個幾星期前先喺會展同佢搞餞別宴，政務司長林鄭月娥、同樣退咗休嘅前運輸及房屋局長鄭汝樺、新民黨主席葉劉淑儀、現任公務員事務局長鄧國威，以及多個常任秘書長等都有出席。


筵開19圍 全英語致辭

餞別宴筵開19圍，幾乎座無虛席，睇嚟D姐人緣真係好唔錯，當晚個個笑容滿面。政務官一直被喻為「天之驕子」，呢班精英嘅英文當然一流，席上無論係D姐定係發言嘉賓，都用英文致辭，可能因為席間都有唔少外籍人士。


葉太獻花畀親密戰友

葉劉淑儀噚日喺facebook上載當晚相片，佢話自己同D姐都係港大校友，早佢一年加入政府，D姐畀佢印象係處事認真，為人一絲不苟，所以好欣賞對方。喺政府工作多年，兩位女將仲試過兩次一齊升職，葉太同D姐分別出任工商司同埋工業署長，葉太形容當時兩人算得上係親密戰友。葉太話共事多年，當晚亦有送花表達心意，話D姐永遠都係佢心目中優秀嘅政務官。