預算案前 財爺又吹淡風？

【明報專訊】明年2月發表嘅財政預算案公眾諮詢展開咗1個月，財爺曾俊華喺網誌話，歐美經濟唔明朗，所以佢喺計劃公共財政嘅時候必須謹慎小心，「應使得使，避免胡亂揮霍，以確保我們有足夠的資源放在儲備內，在適當的時候採取適當的行動」。財爺一向憂患甚濃，成日都話要積穀防饑，唔知係咪又出口術，降低市民對預算案「派糖」嘅期望呢。


話要免揮霍 積穀防饑

政府上個禮拜五公布本港第三季經濟數據，指今年全年經濟增長有1.2%，財爺話最令佢擔心嘅就業人數增長，喺近期開始放緩，最新調查亦顯示本地營商氣氛依然審慎，未來可能會為勞工市場帶嚟一啲壓力。佢又話香港經濟目前「悲喜交集」，悲，係因為疲弱嘅外圍環境繼續拖累香港經濟；喜，係因為本地需求能夠仍然保持堅穩。


喜見本地需求仍堅穩

至於通脹呢，財爺就話食品價格喺美國旱災後反彈，加上美國搞第三輪量化寬鬆（QE3），而本地住宅租金持續上升，所以未來幾個月通脹回落速度可能會較預期慢，所以預計整體通脹率會由3.7%上調至3.9%。財爺因此得出結論，話公共財政必須有未雨綢繆嘅準備，因為經濟不景氣時，政府要用錢提振經濟同為市民解難紓困，所以庫房要儲錢，避免胡亂揮霍！


Emily覺得財爺講嘅嘢唔係無道理，只係太熟口熟面，睇番佢去年同期嘅網誌，當時都係話外圍經濟唔明朗，擔心影響本地就業，所以財爺喺預算案前吹淡風，都唔係第一次。