萬宜石碑惹去殖疑雲

【明報專訊】近期有市民持殖民地年代港英旗示威而惹起爭議，其實，唔少港英時期建造嘅紀念碑，上面都有屬於殖民地年代嘅龍獅徽號，但有市民最近行經萬宜水庫，發現該處一個紀念碑上嘅龍獅消失咗，質疑係特區政府做嘅。呢件事喺網上討論咗幾日，噚日仲有市民將有關問題圖文並茂向立法會投訴。Emily問過水務署，佢哋表明唔關佢哋事，只係紀念碑被風霜侵蝕所致，承諾會搵方法復修。


水署：歷風霜褪色會修復

立法會噚日收到一封名為「投訴破壞古蹟」嘅電郵，有市民將萬宜水庫紀念碑嘅相片附上，指出碑上原本有嘅龍獅標誌無咗。呢位市民話，呢個紀念碑，記載咗英治政府保證本地食水自足嘅治績，但「港共失德，鑿走碑上龍獅徽號，教市民忘恩負義」，批評政府摧殘文物、竄改歷史，仲話政府今日可以破壞「金石器物」，日後可以破壞言論自由咁講，要求水務署將該徽重新髹上。


Emily睇咗張相後，發現的確唔見咗個徽，但單係睇相，難以識別係咪人為破壞，所以去問水務署嘅朋友，佢哋話呢個紀念碑上嘅徽號係用顏料繪畫，經過多年風雨侵蝕，徽號褪色，佢哋已經聯絡古物古蹟辦事處，研究復修紀念碑同徽號嘅可行性同技術要求。