立會物資平賣 發電機都有

【明報專訊】立法會議員除咗有人工收，亦會有一筆錢畀佢哋做營運開支，唔少議員都會添置電腦、辦事處家具等，但就要喺卸任後交還。秘處書將呢啲物品收回後，噚日就發通知畀議員，話會進行第2輪競投，最低競投價係市價六成。Emily睇過有咩物品，發現唔少係手提電腦、電話、碎紙機等，但亦有雪櫃甚至發電機。


上屆物品畀議員競投

大部分用具、電器折舊都幾大，愈係早年買入嘅物品，競投價就愈低，有部1998年買入嘅傳真機，當年買入價2600元，用咗咁多年，秘書處估計市價只值50元，因此議員最低競投價係30元。2000年買入嘅影印機，買入價9800元，最低競投價只係180元。至於比較新啲嘅物品，例如有人喺今年3月用大約3100元買咗部Canon s100相機，競投價就係1650，係咪抵買就見仁見智喇。


至於市價係點樣定，秘書處搵咗獨立合資格估價員睇過物品嘅原價、使用時間同其他資料嚟決定，若果議員有興趣，可以喺12月3日前回覆，價高者得。如果有超過兩人嘅投標價相同，秘書處就抽籤決定。至於想睇吓實物，議員可以喺下星期一去指定地點睇貨。