昂山素姬想盡快訪港

【明報專訊】美國總統奧巴馬早前歷史性出訪緬甸，兼同緬甸反對派領袖、諾貝爾和平獎得主昂山素姬會面；事隔幾日，輪到香港大學校長徐立之同呢位民主鬥士會面，親自向她補頒授港大名譽博士學位，並委任昂山做港大社會科學學院名譽教授。昂山素姬致辭時承諾盡快訪港，同港大生會面，相信好快大家就有機會親睹佢嘅風采！


咁究竟昂山素姬幾時嚟呢，連港大公關都話唔知幾時。公關解釋，昂山已貴為國會議員，要開會，加上昂山要出訪多國，時間表排得密麻麻，連今次會面都係幾經艱辛先安排到，港大歡迎佢隨時來訪。


港大由徐校長率團前往緬甸首都內比都昂山素姬屋企「玫瑰雅舍」，為她舉行簡單隆重嘅名譽博士頒授儀式，由徐立之為昂山頒贈博士袍、簽署名譽博士名冊，以及致辭等環節。


昂山教學生「適當」製造麻煩

昂山致辭時感謝港大，話名銜代表港大認同緬甸人爭取民主嘅努力，而非佢個人努力，強調「改革是建基於希望而不是恐懼，相信明天必定會更好」，而「對自由和安全有信念的人，民主仍是最佳的體制」。她笑言，過往軍政府統治期間，因擔心大學生聚集搞事而破壞大學生活；現時除恢復校園生活，亦應教學生「適當」製造麻煩。


佢同時以自己座右銘「不盡力而為，難言有希望」勉勵港大學生，認為「希望」係人性根深蒂固一部分，勉勵年輕人唔好失去希望，又話自己同年輕人會面可以重拾年輕，希望盡快訪港同港大學生會面咁話。