田氏兄弟齊批高靜芝

【明報專訊】雖然田北俊同田北辰兩兄弟一個自由黨、一個新民黨，喺唔少議題上都有唔同立場，但噚日就團結一致，齊心批評中央政策組。


大少：佢係神仙咩？

田大少話，從來冇聽過中策組要管埋政府嘅人事編制，質疑負責「揀蟀」嘅全職顧問高靜芝，叻極都冇可能一個人物色晒全港逾400個諮詢委員會嘅人選，「佢係神仙咩？邊可以咁神通廣大咁識晒3000幾個委員？」本身係旅遊發展局主席嘅田大少仲話，早喺回歸前，諮詢委員會成員都係由相關政策局同署方推薦，認為佢哋先熟悉業界，識得搵適合嘅人，仲話自由黨會返去開會研究，決定會唔會喺人事編制委員會投票支持中策組加位。


二少：中策組如太監

講起中策組突然「變質」做埋物色人才工作，田二少亦好勞氣，大呼莫名其妙，質疑特首梁振英咁樣做係想搞小圈子，令個別人只要黐住高靜芝，就可以扶搖直上。佢仲揶揄中策組有如太監一樣嘅「權力核心」，認為揀蟀呢個工夫，都係交畀司局長處理比較恰當。