民主黨林卓廷批《寒戰》不符現實

【明報專訊】港產片《寒戰》描寫警方同廉署角力，繼前保安局長、新民黨主席葉劉淑儀撰文提出五大誤點後，做過廉署調查主任嘅民主黨總幹事林卓廷，亦以過來人身分拆解《寒戰》。


做過調查主任 話損廉記公正形象

阿廷早前跟進行會成員林奮強賣樓風波一事已跟得好行，佢講到戲中李治廷飾演廉署首席調查主任，因懷疑副警務處長郭富城違法，請郭「協助調查」。阿廷話，廉署絕對唔會要求被調查者「協助調查」，最多只會正式拘捕或邀請「警誡會面」。


另外一幕，係講李治廷同另一疑犯、副警務處長梁家輝進行警誡會面時，飾演廉署執行處首長嘅徐家傑突然進入會面室同梁家輝寒暄。阿廷話，呢段更不符現實，事關當有警務處高層被廉署調查時，雙方關係必會好緊張嚴肅，如果廉署高層喺前線人員面前與被調查者表現友好，等於向前線人員施壓，損害廉署不偏不倚嘅形象咁話。


Emily聽聞，唔少紀律部隊成員都有睇《寒戰》，甚至係曾任職警隊嘅立法會保安人員都有睇戲，仲加入埋呢個話題討論，口碑就係好壞參半。