唐唐去完南極去巴西

【明報專訊】特首梁振英因為僭建問題身陷險境，佢競選時嘅對手唐英年原來亦喺另一個「絕地」，就係去咗南極。經民聯召集人林健鋒（Jeffrey）喺唐唐出發前，同唐唐兩公婆食飯，佢話雖然今次唐唐兩公婆去旅行並唔係二人世界，但唐太就據稱怕暈船浪，Jeffrey叫佢要攬實個老公！


Jeffrey話，今次唐唐會坐飛機去一個地方，再轉中型船去南極，相信唔會好顛簸，但係就肯定會離船，唔會只係「掠過」南極。唐唐去完南極，會先喺南美玩，去埋巴西先至回港，相信無一頭半個月都唔會見到唐唐啦。


雖然唐唐仲喺外國歎世界，不過大家仍然好關心唐唐喺經民聯會唔會有角色。Jeffrey就話經民聯嘅成員人數已有3位數字，顧問就有20幾個，但唔會講具體人名。至於新嘅經民聯會有總幹事，亦會請多啲人做研究，大家請留意下月18日搞嘅酒會咁話。