反梁團體再現公聽會

【明報專訊】相信大家仲記得政府早前為政改方案同遞補機制舉行公聽會，大批年輕人分身成「蛇齋餅糉社團聯會」、「關注林公工會」等團體表達意見。立法會發展事務委員會下周六舉行公聽會，就東北發展聽取意見，當然唔少得呢啲「創意社團」。今次有人化身「CY治港一塌糊塗協會」同「大話精小爆聯盟」，矛頭直指梁振英。


Emily 噚日講起，立法會今日就新界東北新發展區舉行公聽會，發展局就講番，原來公聽會喺下周六舉行，希望想表達意見嘅市民唔會提早去咗立法會。今次公聽會吸引咗135團體報名，由朝早講到下晝5點，報名嘅包括地產建設商會（地建會）、打鼓嶺鄉事委員會、測量師學會同土地正義聯盟等，仲有成百當地居民逐個發言。上水鄉事委員會亦有動員出席，話過若果有錢賠「連祠堂都可以賣」嘅鄉委會主席侯志強唔知會唔會親身上陣？


至於鄉議局就表明唔會出席，但主席劉皇發寫咗封意見書，支持用傳統新市鎮模式發展東北，明顯同地建會打對台。


下周六舉行 傾東北發展

中策組話過要參與輿論戰，頭號「梁粉」、長遠房屋策略督導委員會委員蔡涯棉已經報咗名。不過反CY嘅聲勢亦好浩大，包括「大話精小爆聯盟」、「香港鋤奸聯盟」、「CY治港一塌糊塗協會」同「反賣港大聯盟」等。由於發展事務委員會主席係發叔，唔少網民話好期待聽發叔親口讀出呢啲組織名喎。