高呼「亞視有良心」 愛港之聲無人理

【明報專訊】亞視報警話城電主席王維基偷文件，話到明有證據，但始終無攞出嚟，噚日亞視主要投資者王征見到記者，就叫記者捉住當年同王維基一齊入主亞視嘅張永霖，話佢係重要證人。王征又繼續懷疑何安達幫王維基做說客，講到明城電除咗電視無其他業務，唔係幫手做電視仲有咩做呢？


曾支持國教嘅「愛港之聲」，噚日叫咗11人撐亞視。佢哋先喺大埔火車站高呼「亞視辦台有良心，市民大眾要關心」，話亞視持平公正，製作嘅節目可以反映沉默市民嘅心聲，甚至提高社會質素！不停叫街坊支持，但叫咗半個鐘都無人理。


抗議商台針對政府

「愛港之聲」仲出動七人車接載部分示威者去大埔亞視總部，其他人就自費坐的士。召集人高達斌盛讚亞視節目「建設和諧」，佢哋仲向亞視執行董事盛品儒獻花同遞交支持信，之後轉戰商台，抗議佢哋成日針對現屆政府，又話商台主持李慧玲話要插邊個，其他人就跟住要插。


高達斌聲稱自己係生意人，愛港之聲係民間自發團體，「完全無任何背景」。不過睇番佢哋嘅facebook，成日轉載同發表挺梁振英政府嘅言論，「好多嗅（臭）烏蠅，影響特首施政，唔該大家幫手拍死佢」。