民記民主黨為標準工時開火

【明報專訊】噚日維園嘅《城市論壇》討論標準工時，台上台下火藥味都好重！其中青年民建聯副主席陳威雄話標準工時會為中小企帶嚟更多掣肘，應該諮詢多啲先決定立唔立法，畀同台嘅民主黨南區區議員區諾軒捉住痛腳，諷刺佢話好詫異聽到民建聯竟然反對標準工時，同佢哋嘅政綱話支持有出入！

青年民建聯成員一聽到呢番話，就大叫區諾軒「唔好亂講嘢」，有成員撲出嚟鬧交，主持謝志峰叫咗幾次「唔好嘈」先控制到場面。青年民建聯主席周浩鼎其後對住區諾軒講要佢「收番你講過嘅說話！」，但佢又話家呢個階段唔適合立法，因為社會未有共識。究竟青年民建聯兩個阿頭喺標準工時立法嘅立場係點呢，Emily真係有啲一頭霧水。