愛港力12•30遊行撐CY

【明報專訊】民陣發起元旦日倒梁遊行，另邊廂，「愛護香港力量」（愛港力）噚日喺facebook發起「愛國愛港．挺梁治港」大遊行，日期搶先喺元旦前嘅禮拜日，即係今個月30號下晝兩點半舉行，由維園遊行去政府總部。


唔揀1•1避民陣倒梁

有支持嘅網民建議愛港力都喺1月1號遊行，擺明車馬同民陣「正面對決」，但有搞手回覆話要顧全秩序、先聲奪人，最後決定30號搶先！

愛港力12．30遊行嘅訴求係「我們要繁榮；我們要安定！反對一切禍港行為」，動員市民企出嚟支持CY，直至噚晚，有七八十個網民表態參加。愛港力話，已經向警方提交遊行申請。似乎係遊行搞手之一、網民Peter Tong噚日喺facebook專頁回應希望元旦遊行嘅網民，話愛港力唔希望同民陣硬碰，提早兩日遊行，更加有助聲威咁話，呼籲市民支持。