尖東忌廉哥拍廣告

【明報專訊】呢期香港邊隻貓最hit？相信非「尖東忌廉哥」莫屬。一度「走失」嘅報檔貓忌廉哥，目前佢facebook嘅「個『貓』專頁」有成4.4萬個粉絲，之前佢喺網頁公布自己有「拍攝工作」，唔少粉絲都好期待，謎底終於揭盅，原來忌廉哥將會成為永安旅遊新一輯廣告嘅主角，力銷永安網全新嘅「即時預訂」功能，個廣告聽日就出街喇！


廣告聽日出街

港人鍾意外遊，隸屬內地旅遊公司攜程旅行網嘅永安旅遊，上月開發咗一個新系統平台，模式類似攜程網，畀港人可以隨時就機票、自遊行套餐等上網格價，仲可以碌埋卡畀埋錢，一條龍服務。


永安旅遊行政總裁梁港蘭（Lanny）話，平台試行咗大概一個月，每日有成千點擊率，而最旺時段居然喺半夜兩三點，Emily相信唔少港人都係放工返到屋企就心郁郁想計劃下旅行。


咁同忌廉哥又有乜關係？佢哋就賣關子，只肯講忌廉哥會帶出個網好多選擇、透明度同自由度都好高咁話！據聞忌廉哥有多個造型，好在佢拍攝時相當聽話，順利完成。忌廉哥嘅粉絲密切留意喇！