田少為艾頓莊唔見特首

【明報專訊】建制派立法會議員前晚同特首梁振英晚宴會面，自由黨唔係好畀面，只派咗資歷最淺嘅鍾國斌出席，作為榮譽主席嘅田北俊唔到。田大少究竟去咗邊？原來佢當晚去咗會展，睇「大姑媽」艾頓莊（Elton John）演唱會！


前晚睇騷不去晚宴

田少要見梁振英唔難，但艾頓莊就少嚟香港，今次佢嘅亞洲巡迴演唱，係為咗慶祝經典歌曲《Rocket Man》面世40周年，所以一票難求，票價488元至1888元。田少就話，如果同建制派開會傾公事，當然要出席，但如果只係畀面出席應酬，咁就可以斟酌，所以寧願去睇演唱會。自由黨一個前主席寧願食快餐店焗豬扒飯唔見特首，而榮譽主席覺得睇演唱會重要啲，梁振英真係要檢討一下同自由黨嘅關係喇。