CY探班為秋生打氣

【明報專訊】特首梁振英近日受到僭建風波困擾，但前日佢仍然心情好好，傍晚仲去演藝學院探班，為舞台劇演員黃秋生、梁祖堯等人打氣，因為佢哋主演嘅舞台劇《極地情聖》當晚首演。


梁讚揚藝術工作者熱誠

梁振英應承下周一到立法會出席答問大會，呢幾日亦頻頻出席各個活動，似乎對去答問大會好有信心，唔使點做好準備咁，前晚探班之後，噚日將呢件事寫網誌同大家分享，話要為文化藝術發展而努力。


佢話，衡量一個社會嘅質素，唔能夠只睇經濟發展，文化藝術發展亦同樣重要，佢話前晚抽時間去演藝學院探班，喺歌劇院舞台上同黃秋生、梁祖堯及台前幕後工作人員短聚，為佢哋打氣。佢讚呢班藝術工作者對戲劇創作嘅熱誠毋庸置疑，亦了解吓本地劇團面對缺乏場地嘅問題，仲話黃秋生同佢講，希望香港有日能夠成為另一個紐約，即係另一個國際文化藝術都會。


梁振英強調，政府會繼續支援本地藝術工作者和藝團，推動藝術教育，鼓勵更多文化工作者發揮所長。