劉華傳做副局 慘變大太監

【明報專訊】政壇劉華（民建聯劉江華）又傳有新動向，其實佢喺立法會落選後就傳過好多，噚日就翻炒佢會出任政制及內地事務局副局長，拍住局長譚志源行孖咇推政改方案，仲講到似層層。劉華就喺call台留言話出埠唔覆機，民建聯主席譚耀宗故作神秘話「不予置評」。不過，呢個消息傳出，網上改圖區就熱鬧喇，由佢參選海報「香港要贏」，二次創作為劉華「點都贏」，到近日熱播嘅大太監海報都有，劉華風采，果然不虛！


譚耀宗：不予置評

有關劉華去向嘅講法多多，有說佢想進修，又話佢會做副局，而佢早前就話會幫民建聯做黨務，噚日再講番佢做副局，仲要因此辭埋區議會職務。佢嘅黨友蔣麗芸就話「真係唔知」，但就覺得劉華有足夠歷練做官。主席譚耀宗就不置可否，反而叫Emily去問劉華，但係劉華又聲稱自己唔喺香港，點問？


泛民就冷眼睇呢個消息，公民黨梁家傑話，論政治歷練，劉華係足夠，但問題係過往嘅人權議題一面倒嘅立場，佢點樣可以「原罪中重生」，真係好有興趣拭目以待。


民主黨何俊仁就狠一啲，話事件若果屬實，說明無人肯做局長，政府搵劉華做官一齊推政改，證明政府同民建聯係同一伙。不過，何俊仁認為，無論邊個做，喺政改問題上都預咗同政府鬧交，最重要係市民嘅聲音，先可以發揮影響力。