葉劉做領隊唔撐CY

【明報專訊】葉劉淑儀創立新民黨，但前身嘅「匯賢智庫」仍然健在，佢噚日以匯賢智庫學苑院長身分帶團去西安睇古蹟，到11號（周二）返香港。換言之，身為行會成員嘅葉太，唔會喺下周一嘅特首答問大會撐梁振英（CY），亦會缺席周二嘅行會會議。


將缺席特首答問大會

呢個考察團一行14人，佢哋會拜訪陝西省文物局，同當地文物專家交流，話想了解內地對文物保存嘅政策同埋研究。不過，Emily睇過佢哋嘅行程，好似係跟旅行團多啲，因為除咗會見當地官員，行程參觀多個著名古蹟，如兵馬俑、華清池、大雁塔、乾陵等，真係行程豐富。


葉太出發前話，學苑一向致力推廣國學，今次去七朝古都，雖然氣溫好凍，但團員一定會把握機會熱心學習喎。考察團成員主要係匯賢智庫學苑學員，包括捷思管理有限公司董事陳世雄、香港移動通訊高級經理姜倩雯、瑞東集團執行董事高穎欣、鳳凰衛視國際營運中心助理李陽雪等。