消委網睇漫畫 學識精明消費

【明報專訊】新修訂嘅《商品說明條例》上個月19號生效，第一次將服務行業納入規管範圍，海關講到明會放蛇同巡查，實啲商戶有冇乖乖守法。為咗令市民更了解新例，消費者委員會噚日推出新網頁，內容包括示範不良營商手法案例嘅「精靈眼」系列短片，同埋不幸被呃嘅「洋葱家族」卡通漫畫，教你分辨消費時有冇被威迫利誘，仲教埋投訴同索償方法。


消委會話，特別開設新網站www.consumer.org.hk/unfair_trade_practices，透過漫畫、短片同埋新聞資訊，加強市民對新修訂嘅認識。


宣傳電視劇月尾播

消委會仲同香港電台合作拍咗13集宣傳電視劇，8月底開始逢周六播放，並會喺10個商場搞巡迴展覽，幫市民做個精明消費者。