欣榮花園商場叫欣榮

【明報專訊】土瓜灣嘅「欣榮花園購物商場」近期搞咗個商場命名比賽，被網友喻為創意之最。點解？因為勝出嘅名係「欣榮商場」！有網民就講笑咁話，若果新名叫「欣．榮商場」，甚至「斤．欠榮商場」，都好似比得獎嘅「欣榮商場」更有創意喎。不過，主辦單位就話，原來比賽唔單係比併創意，而係好似普選咁，要揀最多人挑選嘅名稱。


查實要估中街坊諗咩都唔係咁簡單，海報就寫明，比賽有39戶參賽，最後有7戶得獎。欣榮花園由房協管理，房協徐先生向Emily解釋，原來比賽除咗畀參賽者創作新名，表格仲有「預設」嘅選擇畀參加者挑選。「欣榮商場」就係最多人揀嘅名。


民意最重要

咁點解會有7個人得獎咁多？原來要做冠軍，仲要揀中埋最多人揀嘅英文名，就係「Jubilant Plaza」。徐先生話，已經唔記得有幾多個冠軍戶主。新名會喺商場裝修後採用，獎品係超市現金券。


雖然網友覺得好笑，但位於商場地舖嘅蛋撻王員工，就無網民咁大反應，佢話可能係街坊熟咗「欣榮」呢個名，所以管理處用番都無可厚非。