富三代接棒入培華基金

【明報專訊】由李兆基（四叔）同一班香港工商界老闆創立、目的係為內地培育人材嘅培華教育基金會，每年都會請來傳媒行家，講吓培華嘅發展。Emily噚日湊熱鬧去食飯，見到已故全國政協副主席霍英東嘅孫仔霍啟文，80後嘅佢，已開始跟爸爸霍震寰學做生意，佢話自己係老竇嘅跑腿，賺到嘅都係老竇嘅。


原來霍啟文同家姐霍思緯同埋哥哥霍啟中，被老竇徵召入咗培華基金會。四叔話，培華唔經唔覺成立咗31年，1981年同佢一齊北上嘅工商界朋友，家已80幾歲，後生嘅都六七十歲，所以搵佢哋嘅親屬、第二代或第三代入會，補充新血接班。


第一次出席培華傳媒宴嘅霍啟文，一坐低就請行家叫佢「啟文」，仲首先開口問財經行家點睇個市，仲話入培華係學嘢，亦有入青年聯會了解社會時事，不過佢自己最有興趣學做生意，因為好享受當中嘅過程。佢家南沙、廣州番禺同香港幾邊走，呢度睇下嗰度了解下都唔錯。