劉江華讚難得：政府都做唔到

【明報專訊】噚日係第六屆香港模擬立法會嘅閉幕典禮，主辦機構邀請咗泛民同建制派嘅立會議員一齊主禮，連政制及內地事務局副局長劉江華都係坐上客。劉江華致辭時仲講笑咁話，呢個活動可以得到各大政黨支持，係一件難能可貴嘅事，皆因政府都做唔到。


同學仔倡全民提名選特首

劉江華仲話後生仔可以參政嘅渠道愈嚟愈多，除咗2015年區議會選舉，政治問責制下都有途徑可以參政，不過Emily就諗，最近嘅政治爭議唔知會唔會嚇怕咗一班同學仔嘅參政意欲。


另外，同學即場介紹佢哋5個模擬條例草案，當中包括《2017年行政長官產生辦法條例草案》，同學仔份草案唔止話可以全民提名特首候選人，仲建議香港應該實行政黨政治，主禮嘉賓之一嘅自由黨副主席鍾國斌都笑住咁大讚建議有見地。另一個主禮嘉賓、人民力量嘅「慢必」陳志全就笑住話同學仔只用咗半個月就寫好份模擬草案，唔知梁振英嗰份幾時有呢？