刀花要深 CY教煮紅衫魚

【明報專訊】特首梁振英（CY）星期日去咗天水圍，有挺CY嘅支持者毆打反梁示威者，搞到滿城風雨，CY未有回應，反而噚日喺網誌教人點煮紅衫魚，不過，無論係佢對手抑或資深傳媒人，都唔明CY搞乜。工黨李卓人話要教番佢「豉椒炒魷」先得；導演張堅庭就比喻話，今次教煮餸軟銷形象，「等於個老公，打完老婆，仲同佢搞個大party咁」，作用有限喎！


李卓人：要教佢「豉椒炒魷」

CY喺題為「個半銀錢一條紅衫魚」嘅網誌提到，世界自然基金會上月修訂嘅《海鮮選擇指引》，首次將紅衫魚列入「避免食用」嘅紅色警戒類別。佢無呼籲大家食少啲紅衫魚，反而帶大家重遊50年前舊地，CY回憶佢讀小學五六年級時嘅生活，談到當年屋企煮魚方法，話煮紅衫魚，「刀花」要切得深同密，先可以令魚滲入更濃嘅番茄味。


CY又話紅衫魚要先煎香，再用番茄同薯仔煮，食剩嘅魚頭同魚身仲可以加白醋同芫荽煲成魚湯。至於《指引》將紅衫魚列入紅色警戒，CY就話說明漁業資源管理愈來愈重要。


CY借網誌提出新《指引》，民建聯漁農界議員何俊賢就話覺得《指引》內容唔係好清晰，因為《指引》中嘅情况未必可以套落香港附近水域，而街市嘅魚少咗，亦未必完全同魚量減有關，反而禁止拖網同少咗船出海捉魚都有啲關係。但佢就話唔覺得CY想鼓勵人食紅衫魚，覺得佢只係想講漁業問題。但李卓人話，煮「紅衫魚使乜特首教，大把人識煮」。