EQ遊柏林 大讚單車易租

【明報專訊】民建聯葛珮帆（EQ）最近同老公去咗德國自由行，本身食素嘅EQ去到「鹹豬手」故鄉，本來都驚無啖好食，但佢就話柏林近期好興健康綠色，喺當地仲食咗一份有鮮花做嘅「熱菜沙律」，EQ話一世人未試過食咁多鮮花喎。EQ亦有試用當地嘅「自助單車租用系統」，大讚柏林個租車系統，仲方便過英國倫敦同中國杭州嘅租單車系統。


用App搵車租車畀錢

柏林市民只要用手機App就可以搵到邊度有車，甚至租埋車同畀錢。EQ覺得柏林人當單車係交通工具，仲有單車專用紅綠燈，香港可以參考吓。沙田區議會先前搵中大研究，都話沙田有條件建立香港第一個自助單車租賃系統，EQ係推動者之一。


另外，EQ去咗參觀柏林國會大樓，佢好大頭蝦，唔知兩星期前要預約，最終有柏林IT好朋友為佢喺國會大樓嘅餐廳訂位食飯，EQ先入到議會。EQ話親歷其中先覺得當地國會大樓果然名不虛傳。