撐梁團體論壇 請香港先生論政

【明報專訊】星期日特首梁振英（CY）會去觀塘搞地區諮詢會，但部分撐梁組織去唔到支持，因為佢哋一早安排咗，喺周日晏晝3點喺政府總部東翼廣場搞政改論壇，主講嘉賓都幾特別，包括廉政公署前執行處副處長徐家傑，仲話有參加過「香港先生」嘅白健恩，以及另外兩個神秘演藝界朋友。


稱仲有神秘演藝嘉賓

呢個論壇由「中港青社聯」搞，宣傳單張寫明「支持CY朋友大召集！」，搞手陳玉娥話今次有請泛民主派，由公民黨楊岳橋代表出席，所以可以有正反意見，亦唔怕會有人嚟示威衝擊。


白健恩跟徐家傑學拳

陳玉娥話有好多藝人朋友，但因為佢哋要拍劇，如果電視台有通告要開工，咁就未必嚟到，所以用「神秘嘉賓」來賣關子；至於近期有參演劇播出嘅白健恩，已經答應會嚟。屬肌肉男嘅白健恩，原來跟論壇主講者之一嘅徐家傑學拳，不過，白健恩今年初捲入有關「基鴨」嘅報道中，白健恩就呼冤，而陳玉娥話佢認識白健恩，知道佢為人係點，所以覺得呢啲花邊新聞好好笑，而藝人出席論壇表達政見並無問題。